Der Dokter (Andere Gedichte)
-
- Der Dokter.
Jetz sitz i dreizeah’ Maunat hia,
Hau’ gmoi’t, i spinn gauh’ Seida –
Dô hau’ koi’ Kägereschtaug[1] noh nia
Koim Bour i däarfa bschneida,
Koim gotziga a’n Ôder schla
Und in en Oisa[2] picka,
Au koim a Boi’le neamma’n a,
A Schmarra zema[3] flicka.
Rezettla[4] hau’n i Stucka neu’
A’fanga[5] zwôr verschrieba,
Doch traget mer au dia nix ei’,
Denn äll sinds schuldig blieba.
Füar was hau’n i denn jetz gstudiart
Uff älli Waih und Leida,
An armi Teufel d Kau’scht probiart
Im Säaga’n und im Schneida?
Füar was Mixtura, Guttra,[6] Thee
Wia s Wassar leana schreiba?
So ka’s a’n armer Musié,
Wia’n i, it lang maih treiba.
Wenn oiner au sei’ Hand verbrennt,
A Meassar hôt im Rucka,
Lauft ear voarbei zum Pfuscher gschwind
Und i - hau’ s Nôchigucka.
Jahr Leut, verstauh’t, jetz hau’n i gnua,
So laß me nimma pudla,
Bei ui schla-n-i mei’ Trucha zua –
Jetz kommet mer äll ge Nudla![7]
- ? Elsterauge, Hühnerauge.
- ? Furunkel.
- ? Zusammen.
- ? Rezepte.
- ? Allmählich.
- ? Arzneikolben.
- ? Höhnische Ladung auf die Kirchweih.
Eingetragen am 08.11.2011 09:33:13 von 2rhyme
Autor: Michel Buck
Quelle: de.wikisource.org
Weitere Informationen unter: http://de.wikisource.org
|